Gjykata në Kosovë vazhdon të hënën, më 16 shkurt 2026, seancën e shqyrtimit fillestar për sulmin terrorist të ndodhur më 29 nëntor 2024 në fshatin Varagë të Zubin-Potokut, pranë objektit Ibër-Lepenc.
Në këtë rast janë tre të akuzuar: Jovan Viqentijeviq, i cili akuzohet edhe për spiunazh, vëllai i tij Dragisha Viqentijeviq dhe Igor Dimoviç. Dy të parët akuzohen për rrezikim të rendit kushtetues dhe armëmbajtje pa leje, ndërsa Igor Dimoviç vetëm për armëmbajtje pa leje.
Prokuroria Speciale e Kosovës ka ngritur aktakuzën më 9 dhjetor 2025. Për këtë aktakuzë, ekspertizë ka kryer edhe Byroja Federale amerikane e Hetimit (FBI), duke dhënë prova që lidhin të akuzuarit me sulmin.
Avokati i Jovan Viqentijeviq ka kërkuar përjashtimin e prokurorit Bekim Kodraliu, prokuror për Dukagjinin, që hetoi rastin. Kërkesa është refuzuar nga kryeprokurori Blerim Isufaj në fillim të këtij viti. Kodraliu ka theksuar se "sulmi terrorist ka qenë sulm profesional dhe i koordinuar në mënyrë të përsosur".
Në seancën e së hënës do të lexohet aktakuza, pas së cilës të akuzuarit mund të deklarohen rreth fajësisë.
Ky është sulmi i dytë terrorist në Kosovë pas atij në Banjskë të Zveçanit më 24 shtator 2023. Për rastin e parë, tre persona janë duke u gjykuar, ndërsa të tjerë, përfshirë kreun e grupit Milan Radoiciq, janë në arrati.
Përditësime
Gjykata ka nisur sot seancën e shqyrtimit fillestar për sulmin terrorist të 16 shkurtit në Ibër-Lepenc, e ndërprerë në fund të vitit të kaluar.