Në plazhin Santa Clara del Mar të Argjentinës, të hënën pasdite, dallgët e mëdha të një cunami meteorologjik shkaktuan viktimë dhe plagosje. I vdekuri është kalorësi 29-vjeçar Yair Amir Mano Nunez, i cili ndodhej aty me pushime bashkë me të dashurën e tij. Ai u përfshi në det dhe goditi kokën në shkëmbinj.
Një burrë tjetër pësoi atak në zemër pas përfshirjes në ujë, ndërsa të paktën 35 persona u plagosën, sipas mediave lokale. Dallgët rrëmbyen çanta, çadra dhe shezlongje, duke detyruar vizitorët të ndihmonin njëri-tjetrin për t'u shmangur rrezikut.
Kreu i sindikatës së rojeve bregdetare, Nahuel Nardone, deklaroi se valët arritën lartësi të pabesueshme. Një roje bregdetare përshkroi se deti u tërhoq papritur disa sekonda para se një valë e madhe, si një mur, të godiste bregun. "Nuk kam parë kurrë diçka të tillë më parë", tha ai për një gazetë argjentinase.
Fabian Garcia, kreu i Mbrojtjes Civile të provincës së Buenos Airesit, theksoi se fenomeni është i paparashikueshëm dhe nuk dihet nëse do të përsëritet.
Çfarë është cunami meteorologjik?
Cunamët meteorologjikë nuk shkaktohen nga tërmetet, por nga çrregullimet e presionit atmosferik të lidhura me stuhitë e forta. Fronti i stuhisë krijon valën, e cila amplifikohet pranë bregut për shkak të relievit detar, si shelf kontinental i cekët ose gjiri. Shkencëtarët sapo kanë filluar të kuptojnë këto fenomene, por valë prej 6 metrash ose më shumë janë vërejtur në zona si Liqenet e Mëdha, Gjiri i Meksikës, Bregu i Atlantikut, Mesdheu dhe Deti Adriatik.