Ridvan Krraba, 44-vjeçar nga Kaçaniku, vdiq më 3 prill 2026 në Qendrën Klinike Universitare të Kosovës (QKUK) në Prishtinë si pasojë e lëndimeve të rënda të marra në vendin e punës në Ferizaj.
Ngjarja ndodhi më 28 mars 2026, rreth orës 13:40, në rrugën Remzi Hoxha. Viktima ra nga kati i parë i një ndërtese ku dyshohet se po punonte. Emergjenca e transportoi fillimisht në Emergjencën e Ferizajt, më pas në QKUK.
Zëdhënësi i Policisë së Kosovës për rajonin e Ferizajt, Kanun Veseli, bëri të ditur se në vendngjarje dolën njësia e hetimeve dhe inspektorët e punës, të cilët ndërmorën veprimet procedurale.
Është intervistuar përgjegjësi i punimeve F.S., 46-vjeç, i cili u lirua në procedurë të rregullt.
Prokurori i rastit autorizoi Sektorin e Hetimeve Rajonale në Ferizaj për vazhdimin e hetimeve me qëllim sqarimin e rrethanave dhe shkaktarëve të vdekjes.
Rasti u cilësua si "asgjësimi, dëmtimi ose heqja e pajisjeve mbrojtëse dhe rrezikimi i sigurisë në vendin e punës".