Vedat Muriqi, sulmuesi i kombëtares së Kosovës te Mallorca, ka thyer rekordin historik të golave të shënuar për klubin në La Liga. Me dy golat e tij në fitoren 3-0 ndaj Rayo Vallecano, ai arriti 55 gola, duke kaluar shënuesin e mëparshëm Samuel Eto’o, i cili kishte 54 gola në periudhën 2000-2004.
Klubi Mallorca publikoi një video-urim nga Eto’o, të regjistruar nga Kameruni. Në mesazh, ish-ylli kamerunas shprehu gëzimin për arritjen e Muriqit. “Përshëndetje Vedat! Që këtej nga Kameruni, dua të të jap urimin tim. Urime për atë çfarë arrite të bësh. E di që të është dashur shumë punë, por të kërkoj të vazhdosh kështu. Të vazhdosh të argëtohesh dhe të bësh Mallorcan tonë akoma më të madhe. Urime edhe një herë, ty dhe shokëve të tu të skuadrës që të ndihmuan që të realizosh këtë sipërmarrje. Urime!”, tha Eto’o.
Muriqi u shpreh i befasuar dhe i emocionuar nga surpriza. “Nuk e prisja! Faleminderit shumë për këtë video nga një legjendë e vërtetë si Samuel Eto’o. I vlerësoj shumë fjalët e tij. [...] Jam profesionist prej 15-16 vitesh. Nëse para 15 vitesh do më thoshnin se një ditë Samuel Eto’o do të bënte një video për mua, do thoja që ishte e pamundur. Kjo është falë shokëve të skuadrës, punonjësve të klubit, tifozëve, familjes dhe ishullit”, deklaroi sulmuesi kosovar.
Aktualisht, Muriqi renditet i dyti në listën e golashënuesve të La Ligas me 21 gola dhe një asistim, pas vetëm Kylian Mbappé-së, i cili ka 23 gola dhe 4 asistime.