Erion Veliaj, kryebashkiaku i Tiranës, ka depozituar të martën në GJKKO kërkesën për përjashtimin e gjyqtares Etleva Deda nga shqyrtimi paraprak i çështjes në të cilën është i përfshirë.
Kërkesa është regjistruar në kryesekretarinë e gjykatës dhe do të shqyrtohet brenda afateve kohore nga gjyqtari i posaçëm Bib Ndreca.
Veliaj e kishte shprehur verbalisht pretendimin për përjashtimin e gjyqtares gjatë seancës së së hënës. Në atë seancë, gjyqtarja Etleva Deda vendosi të deklarojë të mbyllur shqyrtimin paraprak dhe të tërhiqet për vendim.
Gjatë procesit, Veliaj pretendoi se nuk ishte njohur me të gjitha aktet e dosjes, pasi ato nuk i ishin vënë në dispozicion. Gjyqtarja e konsideroi këtë si mungesë vullneti të të pandehurit për të dhënë parashtrimet e tij dhe mbylli shqyrtimin.
Përditësime
Erion Veliaj u përplas me trupin gjykues gjatë seancës së 2 shkurtit në GJKKO dhe braktisi sallën e gjyqit. Pas seancës, ai deklaroi shkelje të standardeve ligjore. Veliaj mbahet në paraburgim në Durrës që prej shkurtit të kaluar.