Shërbimet e Policisë Kufitare kanë ndërhyrë për t'u ardhur në ndihmë tre shtetasve, të cilët ndodheshin në vështirësi në hapësirën detare të Velipojës. Mjeti lundrues, i drejtuar nga shtetasi me inicialet I. H., pësoi një defekt teknik gjatë lundrimit, duke e bërë të pamundur vazhdimin e udhëtimit për të dhe dy personat e tjerë që ndodheshin në bord.
Pas marrjes së njoftimit për situatën, efektivët e policisë u nisën menjëherë drejt vendndodhjes së mjetit. Pasi u konstatua se pasagjerët nuk kishin pësuar dëmtime fizike, policia kreu rimorkimin e mjetit deri në breg të detit.
Pas nxjerrjes së mjetit në tokë, autoritetet kryen verifikimet e nevojshme, nga të cilat rezultoi se dokumentacioni i tij ishte i rregullt. Policia Kufitare ka përsëritur thirrjen për qytetarët dhe turistët që, në rast nevoje apo emergjence, të kontaktojnë menjëherë numrin unik 112.