Eralbi Breçani, djali i ish-nëndrejtorit të Policisë së Tiranës Erzen Breçani, është vetëdorëzuar në Spanjë. Ai ishte shpallur në kërkim nga SPAK në kuadër të hetimeve për trafik narkotikësh.
Breçani kishte qëndruar për një kohë në arrati jashtë vendit. Autoritetet shqiptare kishin nisur procedurat për lokalizimin dhe arrestimin e tij në bashkëpunim me partnerët ndërkombëtarë.
Sipas akuzave të SPAK-ut, Eralbi Breçani akuzohet për "trafikimin e narkotikëve" të kryer në formën e bashkëpunimit në "grup të strukturuar kriminal" dhe "kryerjen e veprave penale nga organizata kriminale apo grupi i strukturuar kriminal". Gjithashtu, ai akuzohet për "pastrimin e produkteve të veprës penale apo veprimtarisë kriminale" në bashkëpunim me babain e tij, Erzen Breçanin.
Eralbi Breçani konsiderohet pjesë e një grupi të strukturuar kriminal së bashku me Erzen Breçanin dhe 9 persona të tjerë. Ky grup është përfshirë në trafik ndërkombëtar narkotikësh me lidhje në Amerikën Latine dhe Evropë. Paratë e fituara janë pastruar përmes investimeve në aktivitete të dukshme ligjore.
Erzen Breçani akuzohet kryesisht për "pastrimin e produkteve të veprës penale". Vetëdorëzimi hap rrugën për procedurat e ekstradimit drejt Shqipërisë, ku Eralbi Breçani ka deklaruar se do të përballet me drejtësinë. Procesi pritet të nisë së shpejti.