Qeveria e Kosovës të premten miratoi themelimin e Këshillit Shtetëror për shënimin e 28-vjetorit të Epopesë së Ushtrisë Çlirimtare të Kosovës. Në këtë këshill nuk u përfshi asnjë kategori e dalë nga lufta e UÇK-së.
Si pasojë, Organizata e Veteranëve të Luftës OVL-UÇK, së bashku me kategoritë e tjera, themeloi një këshill organizues paralel për koordinimin e aktiviteteve përkujtimore dhe ceremoniale në kuadër të kësaj ngjarjeje historike.
Nënkryetari i OVL-UÇK, Gazmend Syla, deklaroi se organizata u detyrua ta krijojë këtë këshill për të mos mbetur jashtë organizimeve. Ai shpjegoi se këshilli përfshin personalitete themeluese dhe luftëtarë të UÇK-së, kryesisht për vlerën e tyre simbolike në çlirimin e vendit.
Sipas Sylës, edhe nëse do të merrnin ftesë nga Qeveria, nuk do të merrnin pjesë për shkak të fyerjeve dhe moskujdesit ndaj tyre gjatë gjashtë viteve të fundit. Ai e cilësoi të papranueshme pjesëmarrjen në një këshill ku anëtare është Mimoza Kusari-Lila, e cila kishte kërkuar largimin e veteranëve nga rritja e pagës minimale, si dhe për fyerjet nga pjesëtarë të Qeverisë, përfshirë kryeministrin Albin Kurti.
Syla theksoi se organizimet ideale do të bëheshin së bashku me institucionet, por kërkoi reflektim nga udhëheqësit se pozitat e tyre janë ndërtuar mbi sakrificat e çlirimtarëve.