Nënkryetari i OVL-UÇK-së, Gazmend Syla, deklaroi se organizata nuk do të marrë pjesë në mbledhjen e Këshillit Shtetëror për 28-vjetorin e Epopesë së Ushtrisë Çlirimtare të Kosovës.
Në mbledhjen e së martës së Këshillit Shtetëror është propozuar dërgimi i një ftese të dytë shoqatave të dala nga lufta, pas ngritjes së kësaj çështjeje nga nënkryetari i Komunës së Skenderajt, Fadil Nura.
Sipas Sylës, ftesa e parë, e dërguar me e-mail nga ministria pas një interviste në KosovaPress, nuk ishte ftesë zyrtare, por urdhërore. Ai theksoi se në fund të e-mail-it shkruante "prania e domosdoshme", çka e bënte atë ofendues dhe pa dinjitet.
Syla shtoi se OVL-UÇK-ja, si përfaqësuese e ushtarëve dhe veteranëve të luftës, nuk i nënshtrohet askujt dhe nuk është vartëse e ndonjë ministrie. "Nuk zbatojmë urdhrat e askujt. Ne, ushtarët e Ushtrisë Çlirimtare të Kosovës, urdhrat i kemi zbatuar te komandantët në kohë lufte, por pas lufte jo", deklaroi ai.
Ai nënvizoi se, nëse do të kishin marrë një ftesë pozitive qysh në themelimin e Këshillit nga Qeveria, do ta kishin shqyrtuar në organet udhëheqëse dhe do të kishin deleguar përfaqësues.