Ministria e Mbrojtjes e Kosovës ka reaguar sot ndaj deklaratave të Gazmend Sylës, nënkryetar i OVL-UÇK-së, për mosftesën e përfaqësuesve të organizatave të dala nga lufta e UÇK-së në Këshillin Shtetëror për shënimin e 28-vjetorit të Epopesë së UÇK-së.
Sipas reagimit, pretendimet e Sylës janë të pasakta dhe të pabazuara. Me Vendimin Nr. 01/02, datë 20.02.2026, Qeveria e Republikës së Kosovës ka themeluar këtë këshill, i cili kryesohet nga ministri i Mbrojtjes, Ejup Maqedonci, dhe bashkëkryesohet nga Andin Hoti, ministër i Ministrisë për Punë, Familje dhe Vlera të Luftës Çlirimtare.
Në vendim parashihet shprehimisht përfaqësimi i organizatave të dala nga lufta e UÇK-së si pjesë përbërëse e këshillit. Ministria njofton se sot i është dërguar ftesë zyrtare përfaqësuesit të OVL-UÇK-së për pjesëmarrje, ndërsa takimi inicues mbahet nesër në orën 13:00.
Ministria e Mbrojtjes dhe institucionet e Kosovës theksojnë përkushtimin për bashkëpunim gjithëpërfshirës, transparent dhe institucional. Shënimi i përvjetorit do të realizohet në frymën e unitetit, respektit dhe mirënjohjes për sakrificën e dëshmorëve dhe kontributin e të gjithë pjesëtarëve të Ushtrisë Çlirimtare të Kosovës.