Emisioni Vetting ka zbardhur detaje mbi tenderin e hapur në shtator 2025 nga Drejtoria Rajonale e Sistemit të Shpërndarjes Tiranë për furnizimin me energji elektrike të Durana Tech Park, parkut të parë teknologjik në Shqipëri. Fituesi u shpall në tetor të po atij viti, për të siguruar energji rezidentëve dhe punonjësve të parkut, i cili ndodhet në pronësi të Korporatës Shqiptare të Investimeve, drejtuar nga Elira Kokona.
Parku fizik nuk ekziston ende dhe nuk është vendosur asnjë tullë, ndërkohë që OSSH, e drejtuar nga Blendian Dalipi, ka tenderuar fonde për të. Durana Tech Park është një zonë me tokë shtetërore në qarkun e Durrësit, e dhënë Korporatës për ndërtim dhe administrim. Ai parashikon zyra, godina dhe kompani me lehtësira fiskale, sipas VKM-së nr. 73, datë 29 janar 2025.
Më 18 mars 2025, një muaj pas themelimit dhe regjistrimit, ministri i Ekonomisë, Inovacionit dhe Kulturës, Blendi Gonxhja, firmosi marrëveshjen me Korporatën Shqiptare të Investimeve për inaugurimin virtual të parkut. Dokumentet e siguruara nga Vetting tregojnë se parku funksionon si zonë virtuale me zero taksa dhe përjashtime doganore.
Lidhja me dosjen e AKSHI-së
Parku përdoret nga persona të lidhur me skandalin e Agjencisë Kombëtare të Shoqërisë së Informacionit (AKSHI), të cilët janë pjesë e dosjes së SPAK-ut për paracaktim tenderash dhe faktura fiktive. Mes tyre përmenden:
- Ergys Agasi
- Ermal Beqiri
- Andis Papa
- Gezim Hoxha
Këta individë gëzojnë lehtësira fiskale në park, sipas dokumenteve të Vetting-ut.