Forcat zjarrfikëse të Bashkisë Durrës kanë arritur të vënë nën kontroll zjarrin që kishte përfshirë një magazinë në zonën e Shkozetit. Operacioni, i cili zgjati për më shumë se tri orë, është kryer me koordinim mes disa strukturave të ndryshme.
Në këtë ndërhyrje u përdorën:
• 5 mjete zjarrfikëse
• 4 autobotë
• 1 autoshkallë
Në operacion u angazhuan 24 punonjës të Shërbimit të Mbrojtjes nga Zjarri dhe Shpëtimit (MZSH), të cilëve iu bashkuan forcat dhe mjetet e Portit të Durrësit, si dhe përforcime nga stacioni i MZSH-së Shijak. Aktualisht, ekipet po punojnë për shuarjen përfundimtare të vatrave të mbetura dhe për sigurimin e perimetrit të zonës, ndërsa autoritetet deklarojnë se nuk ka më rrezik për përhapjen e flakëve.
Gjatë operacionit, dy punonjës të shërbimit zjarrfikës, Nadir Kapaj dhe Maliq Gjyli, shfaqën probleme shëndetësore si pasojë e asfiksisë nga tymi. Ata u transportuan menjëherë drejt Spitalit Rajonal të Durrësit, ku po marrin ndihmën e nevojshme mjekësore. Sipas njoftimeve zyrtare, gjendja e tyre shëndetësore paraqitet e qëndrueshme.
Bashkia Durrës ka shprehur mirënjohje për punën e efektivëve në mbrojtje të pronës dhe jetës së qytetarëve, duke u uruar shërim të shpejtë zjarrfikësve të lënduar. Hetimet mbi shkaqet që çuan në rënien e zjarrit janë duke vijuar nga autoritetet përgjegjëse.