Protestat kombëtare kundër qeverisë shqiptare vijojnë për të 42-tën ditë radhazi. Pas përfundimit të fjalimeve përpara godinës së Kryeministrisë, pjesëmarrësit kanë zhvilluar një marshim nëpër akset kryesore të kryeqytetit.
Gjatë marshimit, protestuesit kanë shprehur kërkesën për dorëheqjen e kryeministrit Edi Rama, duke e akuzuar qeverinë për korrupsion. Në thirrjet e tyre, pjesëmarrësit kanë kërkuar ndryshime politike, duke brohoritur slogane si: “Qeveri e krimit”, “Rama në burg, Berisha në burg”, “Shqipëria kërkon revolucion” dhe “Rama jep dorëheqjen”.
Kolona e qytetarëve u ndal për disa minuta në hyrje të zonës së njohur si Rruga e Ambasadave. Gjatë tubimit, aktivisti Visar Dalipi u është drejtuar pjesëmarrësve me një megafon, duke u bërë thirrje qytetarëve që pretendojnë se janë kërcënuar që t'i drejtohen përfaqësive diplomatike për të bërë kërkesat përkatëse.
Organizatorët kanë bërë të ditur se në ditën e 42-të të protestës, lëvizjes i janë bashkuar edhe përfaqësues nga diaspora, të cilët kanë ardhur për të mbështetur kërkesat e protestuesve. Rezistenca vijon nëpër rrugët e Tiranës, ndërsa pjesëmarrësit theksojnë se nuk do të ndalen deri në përmbushjen e kërkesave të tyre.
Përditësime
Protestuesit vijuan sot tubimet në Tiranë, duke shënuar ditën e 41-të të protestës për dorëheqjen e kryeministrit Edi Rama. Marshimi përshkoi itinerarin: Bashkia e Tiranës – 9-katëshet – Rruga e Kavajës – Rruga Myslym Shyri. Organizatorët i fokusuan mesazhet e tyre te procesi i negociatave për anëtarësimin e Shqipërisë në Bashkimin Evropian.