Protesta qytetare, e cila ka hyrë në ditën e saj të 34-t, vijoi edhe këtë të mërkurë me grumbullimin e zakonshëm në sheshin "Skënderbej". Qytetarët marshuan drejt bulevardit "Dëshmorët e Kombit" dhe institucioneve kryesore, duke mbajtur pankarta me kërkesat e tyre.
Fokusi i tubimit të sotëm ishte kërkesa për lirimin e personave të arrestuar pas incidenteve të një dite më parë, të ndodhura përpara godinës së Kuvendit. Në kuadër të këtyre zhvillimeve, protestuesit marshuan edhe drejt Komisariatit nr. 3 në Tiranë. Një prej nismëtarëve të protestës, Arben Kola, u bëri thirrje pjesëmarrësve të shmangin përplasjet me forcat e rendit dhe të mos sulmojnë gazetarët apo operatorët që ndjekin zhvillimet.
Kërkesat e parashtruara nga organizatorët dhe pjesëmarrësit përfshijnë:
• Dorëheqjen e kryeministrit Edi Rama dhe largimin e klasës së vjetër politike;
• Krijimin e një qeverie teknike me mandat një-vjeçar;
• Ndryshimin e ligjit zgjedhor dhe ndërhyrje në Kushtetutë;
• Shfuqizimin e ndryshimeve ligjore për zonat e mbrojtura dhe kundërshtimin e investimit në Zvërnec.
Organizatorët deklaruan se synojnë vijimin e tubimeve në mënyrë të qëndrueshme, duke u zhvendosur në disa prej akseve kryesore të kryeqytetit për të shprehur pakënaqësitë e tyre.
Përditësime
Në ditën e 34-t të protestave në Tiranë, organizatorët shpallën një demonstratë mbarëkombëtare për nesër në orën 19:00, duke ftuar qytetarët nga e gjithë Shqipëria dhe diaspora. Gjatë marshimit të sotëm, protestuesit kaluan pranë Prokurorisë së Tiranës, përshkuan Rrugën e Durrësit dhe u ndalën pranë Bankës së Shqipërisë.