Operacioni për shuarjen e flakëve në masivin pyjor të Krastës në Krujë vijon këtë të hënë, pas një përpjekjeje të shtuar nga toka dhe ajri. Zjarri, i cili shpërtheu ditën e djeshme, ka krijuar vështirësi të mëdha për ekipet e ndërhyrjes për shkak të terrenit të thepisur dhe mungesës së rrugëve të aksesueshme. Si pasojë, zjarrfikësit po përdorin pompa krahu për të neutralizuar vatrat e mbetura, ndërsa në operacion janë angazhuar edhe forca të ushtrisë.
Sipas raportimeve, flakët kanë shkaktuar dëme në një sipërfaqe prej më shumë se 30 hektarë, duke përfshirë pisha, shkurre dhe pemë ulliri. Gjatë fazës fillestare, zjarri u afrua pranë zonave të banuara, duke detyruar dhjetëra banorë të largoheshin nga shtëpitë e tyre për shkaqe sigurie.
Autoritetet janë duke shqyrtuar shkaqet e rënies së zjarrit. Një ndër pistat kryesore të hetimit lidhet me dyshimet se flakët mund të jenë vendosur qëllimisht nga persona që kultivojnë kanabis në këtë zonë, ku zjarret janë regjistruar në mënyrë të përsëritur ndër vite. Ndërkohë, operacione për izolimin e vatrave të zjarrit po zhvillohen edhe në zona të tjera të vendit, si në Mallakastër dhe në Drenie të Patosit, ku janë angazhuar mbi 40 forca zjarrfikëse.
Përditësime
Situata në masivin pyjor të Krastës është drejt izolimit total pas një operacioni intensiv gjatë natës. Forcat zjarrfikëse kanë punuar pa ndërprerje, ndërsa në orët e para të mëngjesit ka nisur edhe ndërhyrja nga ajri për shuarjen e vatrave të fundit. Koordinimi mes forcave tokësore dhe mjeteve ajrore ka shënuar përparim vendimtar në vënien nën kontroll të flakëve.
Situata në Krastë të Krujës është përkeqësuar pas rishfaqjes së vatrave aktive në pjesën veriore dhe përfshirjes së lagjes Abazaj si vatër e re problematike. Forcat e Armatosura rikthyen helikopterin për ndërhyrje nga ajri për shkak të terrenit të vështirë dhe rrezikut të lartë nga prania e depove me lëndë plasëse në afërsi të vijës së zjarrit. Banorët e zonës kanë raportuar vonesa në reagimin e autoriteteve, ndërkohë që flakët po shtrihen drejt zonave të ndjeshme.
Erërat e forta kanë riaktivizuar vatrat e shuar pjesërisht, duke vështirësuar operacionet e forcave zjarrfikëse. Në lagjen Abazaj, banorët janë detyruar të ndërhyjnë fizikisht me mjete rrethanore, pasi terreni i thyer pengon hyrjen e mjeteve mekanike të shërbimit zjarrfikës.
Ministria e Mbrojtjes njoftoi se operacioni për shuarjen e flakëve në Krastë të Krujës ka përfunduar me sukses, duke e vënë vatrën nën kontroll. 50 efektivë të Forcave të Armatosura janë angazhuar në terren për të garantuar izolimin e plotë të zonës. Autoritetet konfirmojnë se flakët nuk përbëjnë më kërcënim për banesat përreth.
Zjarri në Krastë të Krujës është riaktivizuar mbi lagjen Abazaj, pranë zonës së njohur si Kroi i Madh. Ekspertët në terren bëjnë me dije se shtresa e trashë e humusit ka mbajtur prushin aktiv nën sipërfaqe, duke shmangur shuarjen e plotë pas katër ditësh ndërhyrje. Era e fortë ka favorizuar përhapjen e flakëve nga këto vatra të fshehura, duke rikthyer emergjencën në zonë.