Një vatër e konsiderueshme zjarri është regjistruar në zonën e njohur si “Lukovë – Guri i Mekut” në fshatin Shqiponjë të Bashkisë Prrenjas. Flakët kanë përfshirë një sipërfaqe të gjerë me pyje ahu, duke angazhuar strukturat vendore të emergjencave civile dhe forcat zjarrfikëse.
Sipas njoftimeve zyrtare nga Bashkia Prrenjas, efektivët e Mbrojtjes nga Zjarri dhe Shpëtimit (MZSh) kanë punuar pa ndërprerje gjatë gjithë ditës së djeshme dhe vijojnë operacionin për izolimin dhe shuarjen e plotë të vatrave aktive edhe gjatë ditës së sotme. Ndërhyrja po kryhet në kushte të vështira për shkak të terrenit të thyer malor, i cili ka pamundësuar përdorimin e mjeteve zjarrfikëse, duke detyruar ekipet e shpëtimit të veprojnë në këmbë për të frenuar përhapjen e flakëve drejt sipërfaqeve të tjera pyjore.
Në operacion janë bashkuar forcat e Policisë së Shtetit, shërbimit pyjor dhe banorët e zonës, të cilët kanë kontribuar në përballimin e situatës. Autoritetet konfirmojnë se nuk ka dëme në banesa apo persona të lënduar, ndërsa dëmet janë kufizuar vetëm në bimësinë pyjore. Zonat e prekura po mbahen nën monitorim të vazhdueshëm për të shmangur rrezikun e riaktivizimit të vatrave.
Bashkia Prrenjas u ka bërë thirrje qytetarëve të tregojnë kujdes maksimal gjatë kësaj periudhe me temperatura të larta dhe të shmangin çdo veprim që mund të shkaktojë zjarre. Gjithashtu, autoritetet kanë rikujtuar se çdo zjarrvënie e qëllimshme përbën vepër penale dhe dënohet sipas ligjit në fuqi.
Përditësime
Vijon puna për shuarjen e zjarreve në pyjet e qarkut. Autoritetet kanë lokalizuar një vatër aktive në Njësinë Administrative Stravaj, Bashkia Prrenjas, ndërsa një tjetër është raportuar në fshatin Dardhë, Njësia Administrative Hotolisht, në Bashkinë Librazhd. Zjarri në zonën e Librazhdit vijon prej një jave, duke vështirësuar ndërhyrjen e forcave të Mbrojtjes nga Zjarri dhe Shpëtimit.
Bashkia e Prrenjasit konfirmon se operacioni për shuarjen e zjarrit në fshatin Shqiponjë (Njësia Administrative Stravaj) vijon për të tretën ditë radhazi. Ekipet e Mbrojtjes nga Zjarri dhe Shpëtimit po punojnë për neutralizimin e vatrave aktive në terrenin e vështirë malor.