Viktor Orbán, kryeministri hungarez, pranoi humbjen e partisë së tij Fidesz në zgjedhjet parlamentare të mbajtura të dielën në Hungari. Në një fjalim para mbështetësve, ai e cilësoi rezultatin "të qartë dhe të dhimbshëm" dhe falënderoi rreth 2.5 milionë votues që mbështetën forcën e tij politike.
Orbán u zotua se do të rindërtojë komunitetet dhe theksoi se "ne kurrë nuk dorëzohemi". Ky pranim shënon fundin e sundimit të tij 16-vjeçar.
Lideri i opozitës, Péter Magyar, udhëheqës i partisë Tisza, konfirmoi se ka marrë një telefonatë nga Orbán, i cili e uroi për fitoren. Me rreth 60% të votave të numëruara, opozita pritet të sigurojë shumicë prej dy të tretash në parlament, duke mundësuar ndryshime në strukturat kryesore të pushtetit.
Zgjedhjet patën pjesëmarrje rekord dhe u konsideruan vendimtare për të ardhmen e Hungarisë. Rezultati pritet të ndikojë në raportet e vendit me Bashkimin Evropian dhe më gjerë.