Pak ditë përpara çerekfinales së Kupës së Botës 2026 që do të zhvillohet të shtunën në Miami, kampet e Anglisë dhe Norvegjisë janë përfshirë nga shqetësime shëndetësore për shkak të një virusi që ka prekur lojtarët.
Te përfaqësuesja angleze, mesfushori Declan Rice është izoluar nga grupi dhe ka munguar në dy seanca stërvitore radhazi për të parandaluar përhapjen e infeksionit. Përveç kësaj, Rice kishte shfaqur më herët shqetësime fizike në kofshë dhe në pjesën e poshtme të shpinës. Federata Angleze e Futbollit bën me dije se situata po monitorohet dhe vlerësohet si e kontrolluar.
Edhe kombëtarja e Norvegjisë po përballet me probleme të ngjashme. Portieri Orjan Nyland konfirmoi se disa futbollistë janë prekur nga sëmundja dhe se stafi mjekësor po punon intensivisht për menaxhimin e gjendjes. Më herët, për shkak të sëmundjes, skuadra nordike nuk ka pasur në dispozicion lojtarë si Jorgen Strand Larsen dhe Marcus Holmgren Pedersen. Gjithashtu, trajneri Stale Solbakken është vënë re duke kollitur gjatë konferencës për shtyp, fakt që ka shtuar shqetësimet në kampin norvegjez.