Arben Vitia, ministër në detyrë i Shëndetësisë, u intervistua të premten nga Prokuroria Speciale në lidhje me projektin e ndërtimit të Spitalit Rajonal të Ferizajt, i cili ka mbetur i papërfunduar.
Prokuroria Speciale konfirmoi intervistimin, duke thënë se z. Arben Vitia u intervistua me autorizimin e saj lidhur me një rast në trajtim, por nuk dha detaje për të ruajtur integritetin hetimor.
Sipas Durim Elshanit, këshilltar politik i Vitisë, intervistimi erdhi pas padisë së ngritur nga operatori ekonomik Arbëria Com kundër Ministrisë së Shëndetësisë në gusht të vitit 2025. Prokuroria u vu në lëvizje brenda pak muajsh, ndonëse Ministria kishte dorëzuar kallëzim penal kundër këtij operatori që në vitin 2021, pas ndërprerjes së kontratës për dyshime mbi përmbushjen e detyrimeve kontraktuale. Ministria përsëriti thirrjen publike për trajtimin e rastit edhe në vitin 2024.
Projekti u paraqit nga Komuna e Ferizajt në vitin 2016, u pranua nga Ministria pavarësisht mangësive si mungesa e detajimit, dhe zbatimi nisi në vitin 2018, gjatë qeverisjes së koalicionit PAN. Spitali, me 22 mijë metra katrorë dhe afat përfundimi 600 ditë, duhej të shërbente mbi 300 mijë banorë.
Disa burime raportojnë se intervistimi lidhet me dyshime për keqpërdorime në projekt, ndërsa zyra e Vitisë e lidh me padinë e kontraktorit. Vitia deklaroi: "Shumë shpejtë besoj që do të sqarohet dhe nga Prokuroria Speciale dhe nga unë".