Në Kuvend u zhvillua interpelancë mes ministres së Shëndetësisë dhe Mirëqenies Sociale Evis Sala dhe deputetit të Partisë Demokratike Saimir Korreshi lidhur me gjendjen në Spitalin Bashkiak të Lushnjës.
Deputeti Korreshi ngriti akuza për zhvendosjen e strukturave spitalore në ambiente të papërshtatshme, mungesë ilaçeje dhe pajisjesh, si dhe prani të personelit jo profesional në kuzhinë. Ai përmendi mbi 100 milionë lekë medikamente të skaduara dhe kërkoi marrje përgjegjësie nga ministria.
Ministrja Sala deklaroi se Spitali i Lushnjës është përfshirë në programin kombëtar të investimeve në infrastrukturën spitalore. Punimet kanë filluar zyrtarisht më 4 mars 2026 me ndërhyrje në godinën numër 3, ku përfshihen urgjenca, imazheria, kirurgjia dhe reanimacioni. Për vitin 2026 janë planifikuar rreth 82 milionë lekë, ndërsa për 2027 parashikohen 236 milionë lekë të tjera.
Ministrja theksoi se problematikat janë trashëgimi e mungesës së investimeve ndër vite dhe se spitali mbulon mbi 63 mijë banorë në godina të ndërtuara para viteve 1990. Ajo shtoi se është hartuar plan i përkohshëm riorganizimi për të garantuar vazhdimësinë e shërbimeve gjatë procesit të rikonstruksionit.