Qytetarë të shumtë u mblodhën sot në Lushnjë për të kundërshtuar gjendjen aktuale të shërbimit shëndetësor në qytet. Pjesëmarrësit, nën thirrjen e deputetit Saimir Korreshi, denoncuan mungesën e infrastrukturës bazë dhe vështirësitë në marrjen e shërbimeve mjekësore cilësore.
Protesta nisi para Spitalit të Lushnjës, ku qytetarët shprehën shqetësimet për problematikat e vazhdueshme të këtij institucioni. Sipas tyre, mungesa e investimeve ka ndikuar drejtpërdrejt në trajtimin e pacientëve. Pas këtij grumbullimi, turma marshoi në këmbë drejt sheshit qendror dhe ndërtesës së Bashkisë, për të kërkuar nga autoritetet ndërhyrje konkrete.
Një ndër kërkesat kryesore të ngritura gjatë tubimit ishte sigurimi i statusit të spitalit rajonal, që sipas protestuesve, do të mundësonte standarde më të larta për shërbimet mjekësore. Deputeti Korreshi vlerësoi përmes rrjeteve sociale angazhimin e qytetarëve, duke e cilësuar si një kërkesë të domosdoshme për kushte dinjitoze. Protestuesit theksuan se përgjegjësia për gjendjen e rënduar të sistemit shëndetësor në zonë bie mbi qeveritë ndër vite.