Ish-Presidentja e Kosovës, Vjosa Osmani, ka reaguar pas shpalljes së rezultateve të zgjedhjeve përmes një mesazhi falënderues drejtuar qytetarëve dhe mbështetësve të Lidhjes Demokratike të Kosovës (LDK).
Në një postim në rrjetet sociale, ajo ka vlerësuar kontributin e të rinjve, grave dhe diasporës në këtë proces, duke theksuar se fushata ishte mundësi për të dëgjuar shqetësimet dhe pritshmëritë e qytetarëve. Osmani nënvizoi se pjesëmarrja e saj në këto zgjedhje kishte si qëllim mbështetjen e procesit të ringritjes së LDK-së dhe rikthimin e balancave demokratike në vend.
Sipas saj, ky rezultat nuk shënon fundin e një gare, por vazhdimësinë e një misioni për t'i shërbyer shtetit me përkushtim dhe ndershmëri. Në lidhje me procesin e formimit të qeverisjes, ajo ka përsëritur qëndrimin e saj publik:
"Emri im as nuk ka qenë, as nuk është e as nuk do të bëhet pengesë në krijimin e institucioneve."
Osmani shtoi se fokusi aktual mbetet te tejkalimi i krizave dhe sigurimi i funksionimit të qëndrueshëm të shtetit.
Përditësime
Presidentja Vjosa Osmani deklaroi se kandidatura e saj për një mandat të ri nuk duhet të shihet si pengesë nga Lëvizja Vetëvendosje. Gjatë një konference të përbashkët me kryetarin e Lidhjes Demokratike të Kosovës (LDK), Lumir Abdixhiku, ajo theksoi se përparësitë e saj mbeten mbrojtja e sovranitetit dhe rendit kushtetues, ruajtja e standardeve demokratike dhe forcimi i aleancave ndërkombëtare të Kosovës.