Sekretarja e Përgjithshme e Partisë Demokratike të Kosovës (PDK), Vlora Çitaku, ka kërkuar angazhim dhe mbështetje të pandërprerë për ish-krerët e Ushtrisë Çlirimtare të Kosovës. Përmes një postimi në rrjetin social Facebook, Çitaku ka ftuar qytetarët që të jenë të pranishëm në vazhdimësi, duke theksuar rëndësinë e këtij veprimi për historinë dhe të ardhmen e vendit.
“Edhe sonte, edhe nesër. Ditë e natë. Në këmbë për Kosovën. Për historinë dhe të ardhmen tonë”, ka shkruar Çitaku në njoftimin e saj. Kjo thirrje për mobilizim masiv shënon organizimin e radhës në kuadër të protestave që po mbahen për çlirimtarët.
Në mbrëmjen e sotme është parashikuar të mbahet nata e 7-të e protestës në sheshin Skënderbeu në Prishtinë. Kjo protestë ka për qëllim shprehjen e pakënaqësisë dhe mbështetjen për ish-udhëheqësit e UÇK-së, të cilët po përballen me procese gjyqësore ndërkombëtare.