Sektori i turizmit në qytetin e Vlorës po përballet me pasiguri lidhur me ecurinë e sezonit veror, si pasojë e protestave që po zhvillohen prej dy javësh në kryeqytet. Ndonëse gjatë muajve mars, prill dhe maj u regjistrua një rritje prej 13% në fluksin e turistëve krahasuar me një vit më parë, ditët e fundit operatorët dhe strukturat akomoduese kanë raportuar anulime të rezervimeve nga vizitorët e huaj.
Kreu i operatorëve turistikë të jugut, Vasil Bedinaj, theksoi se pasiguria dhe perceptimi negativ ndikojnë drejtpërdrejt në industrinë e turizmit dhe zinxhirin ekonomik të lidhur me të. Sipas Bedinaj, edhe pse e drejta për protestë është e garantuar, momenti i zgjedhur për këto zhvillime është problematik pasi përkon me kulmin e sezonit turistik.
Nga ana tjetër, turistët e huaj që po vizitojnë aktualisht vendin kanë shprehur mendime të ndryshme lidhur me situatën. Pjesa më e madhe e tyre, veçanërisht vizitorë nga Polonia, kanë deklaruar se ishin informuar për protestat përpara mbërritjes, por kjo nuk e ka ndryshuar vendimin e tyre për të pushuar në Shqipëri. Ata theksojnë se nuk ndihen të rrezikuar dhe se situata nuk ka ndikuar drejtpërdrejt në pushimet e tyre, pavarësisht perceptimit të krijuar jashtë vendit.
Pavarësisht kësaj situate, pritshmëritë mbeten optimiste për një sezon të mbarë. Kujtojmë se vitin e kaluar Shqipëria regjistroi shifra rekord me mbi 12 milionë turistë.