Shërbimet e Komisariatit të Policisë Vlorë kanë finalizuar me sukses operacionin policor të koduar “Again”, bazuar në informacionet e siguruara në rrugë operative për dy shtetas që dyshohej se kryenin vjedhje në banesa. Në flagrancë u arrestuan shtetasit A. G., 48 vjeç, dhe A. H., 46 vjeç, të dy banues në Tiranë, të cilët rezultuan me precedentë të theksuar penalë.
Sipas njoftimit të policisë, të dy të arrestuarit u kapën në lagjen “Bashkimi” në momentin kur, nëpërmjet përdorimit të pajisjeve të posaçme, po tentonin të hapnin derën e një banese për të kryer vjedhje. Nga verifikimet e kryera rezultoi se personat në fjalë kishin thyer masën e sigurisë “Arrest në shtëpi”, e cila ishte caktuar ndaj tyre për të njëjtën vepër penale, dhe ishin zhvendosur nga Tirana drejt Vlorës për të vijuar veprimtarinë e tyre kriminale.
Në cilësinë e provës materiale, policia sekuestroi:
- Pajisje të ndryshme për hapjen e bravave dhe kasafortave;
- Një automjet tip “Mercedes-Benz” që përdorej nga autorët;
- Dy telefona celularë.
Materialet procedurale i janë referuar Prokurorisë për veprat penale “Vjedhja”, mbetur në tentativë, dhe “Largimi i të burgosurit nga vendi i qëndrimit”.
Përditësime
Autoritetet kanë identifikuar të arrestuarit si Agron Goxhaj, 48 vjeç, dhe Andi Hasani, 46 vjeç. Hetimet zbuluan se dyshja ka precedentë të mëparshëm penalë. Një ndër to përfshin një episod në zonën e Porcelanit në Tiranë, ku pasi kishin vjedhur një kasafortë me armë nga banesa e një punonjësi policie, ata u kthyen për ta rikthyer atë nga frika e pasojave, moment kur u ndaluan nga forcat e rendit.