Presidenti i Ukrainës, Volodymyr Zelensky, mori pjesë si i ftuar në samitin e vendeve të grupit NB8 (Nordic-Baltic Eight), të zhvilluar në Talin të Estonisë. Gjatë vizitës, Zelensky zhvilloi takime dypalëshe me presidentin estonez Alar Karis dhe disa kryeministra të rajonit.
Grupi NB8, që përbëhet nga Suedia, Finlanda, Norvegjia, Islanda, Danimarka, Estonia, Letonia dhe Lituania, mbetet një ndër mbështetësit kryesorë të Ukrainës. Sipas Kancelarisë Shtetërore të Estonisë, këto tetë vende kanë akorduar mbi 42 miliardë euro ndihmë, duke u renditur si kontribuesit më të mëdhenj për frymë në botë. Kryeministri estonez, Kristen Michal, u shpreh se fokusi i takimit është forcimi i kapaciteteve mbrojtëse të Ukrainës dhe rritja e presionit ndaj Rusisë.
Një temë thelbësore e bisedimeve ishte siguria rajonale dhe parandalimi i hyrjes së dronëve në hapësirën ajrore të vendeve baltike dhe Finlandës. Këta dronë, të përdorur nga Kievi për sulme në veriperëndim të Rusisë, kanë hyrë herë pas here në hapësirën ajrore të vendeve fqinje për shkak të devijimit nga kursi. Në Letoni u raportua për rrëzimin e një mjeti ajror pa pilot, ndërsa Estonia ka ndërmarrë masa të ngjashme përmes avionëve luftarakë të NATO-s. Këto incidente, ndonëse pa viktima apo dëme të mëdha, kanë nxitur debate politike dhe kanë rritur tensionet në rajon.