Ursula von der Leyen, presidente e Komisionit Evropian, deklaroi se "ka ardhur koha që Ballkani Perëndimor të jetë pjesë e BE-së që tani". Kjo u tha më 9 mars 2026, ndërsa bota përballet me konfliktin e armatosur në Lindjen e Mesme, veçanërisht luftën ndaj Iranit.
Sipas saj, rendi botëror i vjetër nuk ekziston më dhe Europa duhet të përgatitet duke afruar Ballkanin Perëndimor, Moldavinë dhe Ukrainën me Bashkimin Evropian. "Zgjerimi nuk ka të bëjë me ideologjinë. Është një çështje interesi dhe sigurie të përbashkët europiane. Ne duhet të jemi gati të përmbushim detyrat sapo të vijë koha", u shpreh ajo.
Sa i përket luftës ndaj Iranit, Von der Leyen kërkoi që Europa të përqendrohet në realitet. "Nuk duhet të derdhen lot për regjimin iranian. Ne duhet të jemi të përgatitur ta projektojmë fuqinë tonë në mënyrë më të vendosur", tha presidentja e Komisionit Evropian.
Deklarata erdhi në prag të mbledhjes në Bruksel të ministrave të Brendshëm të Bashkimit Evropian. Ata diskutuan situatën e sigurisë pas fillimit të konfliktit me Iranin, si dhe mundësinë e një vale të re emigracioni drejt Evropës.