Presidenti i Serbisë, Aleksandar Vuçiç, deklaroi se vizita e presidentit të Shqipërisë, Bajram Begaj, në jug të Serbisë u zhvillua në përputhje me procedurat zyrtare. Sipas Vuçiç, pala shqiptare ka bërë kërkesën në mënyrë të rregullt dhe institucionet serbe kanë dhënë të gjitha autorizimet e nevojshme.
Duke iu përgjigjur interesimit të agjencisë JUGpress lidhur me personat e armatosur me armë të gjata që u panë gjatë sigurimit të delegacionit në Bujanoc, presidenti serb u përgjigj shkurt se ata ishin "tanët", duke iu referuar forcave të sigurisë së Serbisë.
Vizita e Begajt në Bujanoc dhe Preshevë ka shkaktuar reagime në skenën politike serbe. Gjatë një seance në Kuvendin e Serbisë, përfaqësues të opozitës shprehën kritika ndaj mënyrës së organizimit dhe protokolleve të sigurisë.
Kryetari i Lëvizjes Popullore të Serbisë (NPS), Miroslav Aleksiç, vuri në dyshim menaxhimin e vizitës nga ana e pushtetit. Në të njëjtën linjë, deputeti i NPS, Aleksandar Ivanoviç, kërkoi sqarime mbi praninë e personave të armatosur në ndërtesën e komunës dhe vendosjen e flamurit shqiptar, duke pretenduar se këto detaje duhet të ishin trajtuar ekskluzivisht nga njësitë policore të shtetit serb.
Kryetari i Partisë së Re Demokratike të Serbisë (DSS), Millosh Jovanoviç, e interpretoi vizitën si pjesë e zhvillimeve më të gjera gjeopolitike dhe aspiratave kombëtare shqiptare në rajon.