Gjykata Themelore në Prishtinë, nën drejtimin e gjyqtarit Driton Berisha, shpalli aktgjykimin dënues ndaj Vullnet Gashit, duke e dënuar me 1 vit e 4 muaj burgim për veprën penale “Rrezikimi i trafikut publik”. Aksidenti me fatalitet kishte ndodhur më 2 dhjetor 2023 në rrugën “Bill Clinton”, ku mbeti i vdekur këmbësori Ferhat Bejtullahu.
Sipas aktakuzës së ngritur më 27 shkurt 2024, Vullnet Gashi drejtonte automjetin pa patentë shofer dhe lëvizte në shiritin e djathtë të rrugës, të dedikuar ekskluzivisht për autobusë dhe taksi. Prokuroria argumentoi se i akuzuari, nga pakujdesia, nuk e kishte përshtatur shpejtësinë me kushtet e rrugës, duke goditur me pjesën ballore të automjetit viktimën, i cili ishte duke kaluar rrugën jashtë vendkalimit të këmbësorëve. Raporti i autopsisë konstatoi se vdekja e të ndjerit ishte e dhunshme dhe kishte ardhur si pasojë e traumës së shumëfishtë.
Në fjalën përfundimtare, prokurori Ardian Mehmeti kërkoi dënim me burgim efektiv, duke theksuar se Gashi kishte një historik të rënduar me 117 dënime për kundërvajtje në trafik. Pala e dëmtuar, përfaqësuar nga avokati Emrush Kastrati, shprehu qëndrimin se drejtësia është vënë në vend, ndërsa vajza e viktimës, Sihana Bejtullahu, e përshkroi procesin gjyqësor si një rrugë të gjatë dhe të mundimshme.
Nga ana tjetër, mbrojtja e të akuzuarit, e përfaqësuar nga avokati Driton Muharremi, kishte pretenduar se nuk ishte vërtetuar kryerja e veprës penale, duke kërkuar lirimin e klientit. Vullnet Gashi, i cili nuk ishte i pranishëm në shpalljen e aktgjykimit, ishte deklaruar i pafajshëm në seancën fillestare të mbajtur më 18 tetor 2024. Gjykata obligoi të dënuarin të paguajë shpenzimet gjyqësore, ndërsa palët kanë të drejtë ankese në Gjykatën e Apelit brenda afatit ligjor prej 30 ditësh.