Steve Witkoff, i dërguari special i presidentit Donald Trump, deklaroi se takimet midis SHBA-së dhe Iranit mund të zhvillohen këtë javë. Në një aktivitet në Miami, ai u shpreh: “Ne mendojmë se do të ketë takime këtë javë. Sigurisht që shpresojmë për këtë.”
Witkoff vlerësoi si “një gjë vërtet pozitive” zgjatjen e pezullimit të sulmeve amerikane në objektivat energjetike iraniane, të vendosur nga Trump. Ai theksoi se është “e qartë” se palët po negociojnë, pasi disa anije tani po kalojnë nëpër Ngushticën e Hormuzit. Witkoff shtoi se palët mund të kenë përkufizime të ndryshme të negociatave.
Sekretari i Shtetit, Marco Rubio, deklaroi se SHBA-të ende nuk kanë marrë përgjigje zyrtare nga Irani për propozimin prej 15 pikash, të paraqitur për t’i dhënë fund konfliktit. Në një intervistë për CNN, Rubio përmendi shkëmbime mesazhesh dhe sinjale për gatishmëri dialogu, por theksoi mungesën e qartësisë mbi përfaqësimin iranian. Kjo pengesë lidhet me goditjet e fundit në strukturat drejtuese të Iranit.