Kryeministri në detyrë, Albin Kurti, mori pjesë në ceremoninë e përurimit të bazës së re operative, duke e vlerësuar këtë si tregues të rritjes së besimit ndërkombëtar ndaj Kosovës për investime. Sipas qeverisë, ky zhvillim ndikon në integrimin e mëtejshëm të vendit në rrjetet evropiane të transportit dhe nxit lëvizjen e lirë të njerëzve.
Sipas përfaqësuesve të Wizz Air, baza do të funksionalizohet plotësisht nga muaji nëntor. Përveç gjashtë linjave ekzistuese për në Londër, Dortmund, Memmingen, Bratislavë, Milano dhe Romë, kompania ka paralajmëruar tri linja të reja:
- Bruksel: tri herë në javë
- Karlsruhe/Baden-Baden: katër herë në javë
- Bazel: fluturime të përditshme
Në fjalën e tij, Kurti theksoi se Aeroporti Ndërkombëtar i Prishtinës ka shënuar rekord me 4.6 milionë pasagjerë, duke iu afruar objektivit prej 5 milionësh. Qeveria kërkon që zgjerimi i kapaciteteve të shoqërohet edhe me bileta më të përballueshme për qytetarët dhe mërgatën.
Përditësime
Ministri në detyrë i Infrastrukturës dhe Transportit, Dimal Basha, pas takimit me menaxhmentin e Wizz Air me rastin e përurimit të bazës së re operative në Prishtinë, konfirmoi dy prioritete kryesore: uljen e çmimeve të biletave për pasagjerët dhe zgjerimin e mëtejshëm të operacioneve të kompanisë në Aeroportin e Prishtinës.