Anëtari i PDK-së, Xhavit Haliti, në një deklaratë për RTV21, ka theksuar se partia e tij është e hapur për dialog me të gjitha forcat politike për krijimin e institucioneve paszgjedhore. Ai nënvizoi se procesi i ndërtimit të qeverisë, Kuvendit dhe postit të Presidentit duhet të bazohet në marrëveshje politike.
Sipas Halitit, roli i Lëvizjes Vetëvendosje (LVV) do të jetë vendimtar në këtë proces, megjithatë ai shtoi se ekziston edhe mundësia e krijimit të një koalicioni më të gjerë pa pjesëmarrjen e LVV-së, varësisht nga numrat që do të dalin në përfundim të zgjedhjeve. Ai shprehu qëndrimin se Presidenti duhet të jetë një figurë që përfaqëson vendin denjësisht dhe gëzon besimin e nevojshëm, duke shtuar se është e udhës që ky kandidat të vijë nga krahu opozitar.
"Marrëveshja është e domosdoshme edhe për presidentin, edhe për qeverinë dhe për kryetarin e Kuvendit. Çdo kandidat për president në këtë situatë duhet të ketë besimin që s’do të jetë oponencë e qeverisë", deklaroi Haliti.