Analiza e publikuar nga Eduard Zaloshnja nxjerr në pah kontrastin midis qëndrimeve të shprehura në anketa dhe angazhimit fizik në protestat e nisura pas përplasjes së dhunshme në Zvërnec. Sipas autorit, ndonëse mbështetja deklarative është e konsiderueshme, sidomos në kryeqytet, pjesëmarrja mbetet e ulët.
Në qytete si Korçë, Durrës, Shkodër dhe Fier, numri i protestuesve në ditët e para ishte i kufizuar në disa qindra persona. Në Tiranë, protestat bulevardore kanë vijuar me pak mijëra pjesëmarrës, me përjashtim të datës 20 qershor, kur numri u rrit ndjeshëm nga pjesëmarrja e qytetarëve që erdhën nga diaspora dhe trojet e tjera shqiptare, të cilët nuk ishin pjesë e sondazheve.
Vëzhgimet në terren të analistit tregojnë se një pjesë e qytetarëve që deklarohen mbështetës, vazhdojnë rutinën e tyre nëpër kafene, duke ndjekur ndeshjet e kampionatit botëror ose duke vijuar bisedat e përditshme. Zaloshnja nënvizon se në qytete si Fieri, situata ka qenë mjaft e qetë, duke argumentuar se për shumicën është më e lehtë të shprehësh përkrahje në një sondazh sesa të angazhohesh fizikisht në protestë.