Mbrëmjen e 1 shkurtit 2026, rreth orës 21:00, në fshatin Rrilë të Lezhës, ndodhi një përplasje me armë zjarri në një berberhanë. Si pasojë, u plagos Sokol Daci, 30 vjeç, i cili ndodhej brenda lokalit. Ai u dërgua fillimisht në Spitalin Rajonal të Lezhës dhe më pas në Spitalin e Traumës.
Dyshohet se shënjestra kryesore ishte Merando Nikulaj, 21 vjeç, i cili sipas hetimeve ka mbetur i plagosur, por nuk është paraqitur në spital. Autoritetet kanë zbardhur emrat e tre personave të dyshuar si autorë: Gerardo Ndoka, Eliseo Ndoka dhe Kevin Ndoka, anëtarë të fisit Ndoka. Kevin Ndoka është nip i ish-deputetit socialist Arben Ndoka.
Gjithashtu, Merando Nikulaj është shpallur në kërkim si i dyshuar. Të katër dyshohen për veprat penale "Vrasje me dashje e mbetur në tentativë" dhe "Mbjajtje pa leje të armëve të zjarrit dhe municionit".
Në lidhje me ngjarjen, policia ka ndaluar efektivin Besart Kovaçi, 24 vjeç, banues në Dragushë të Lezhës, i dyshuar për "Shpërdorimin e detyrës". Në armën e tij u gjetën 15 plumba jashtë dhe 5 brenda pistoletës, duke treguar se ka qëlluar 10 herë kundrejt autorëve.
Konflikti paraprak
Ngjarja duket se lidhet me një konflikt të mëparshëm në verë mes Nikulajve dhe Ndokave pranë zonës së plazhit, ku Nikulajtë kanë hotel. Dy djem të Nikulajve përplasën motorin me djemtë e fisit Ndoka, duke çuar në konfrontim fizik me shkopinj bejsbolli dhe sende të tjera. Merando Nikulaj është çuar në gjyq për këtë sherr.
Grupi i Posaçëm Hetimor i Drejtorisë Vendore të Policisë Lezhë, nën drejtimin e Prokurorisë pranë Gjykatës së Shkallës së Parë Lezhë, vijon hetimet për kapjen e personave në kërkim dhe dokumentimin e plotë ligjor. Materialet janë referuar në prokurori.