Në Rrile të Lezhës, mbrëmjen e 1 shkurtit, ka ndodhur një përplasje me armë zjarri në një berberhane, ku objektiv dyshohet të ketë qenë Merando Nikulaj, 21 vjeç. Pronari i berberhanes, Sokol Daci, mbeti i plagosur gabimisht me tre plumba në trup.
Sipas pamjeve të kamerave të sigurisë, autorët kishin informacion të saktë për praninë e Nikulajt në sallon. Ata u afruan pranë berberhanes me dy automjete të ndryshme. Dy prej tyre, maskuar me kapuçë dhe të pajisur me shkopinj bejsbolli, hynë në sallon.
Hetuesit dyshojnë se i pari që qëlloi me armë zjarri ishte efektivi i patrullës së përgjithshme, Besart Kovaçi, 24 vjeç, për t'i neutralizuar autorët. Pas të shtënave të tij, të tjerët nga automjetet qëlluan me mbi 30 plumba kallashnikovi drejt sallonit.
Deri tani janë identifikuar Gerardo Ndoka, Eliseo Ndoka dhe Kevin Ndoka, të shpallur në kërkim për tentativë vrasjeje. Po për të njëjtën akuzë është shpallur në kërkim edhe Merando Nikulaj, i cili dyshohet se qëlloi me armë nga brenda berberhanes dhe mbeti i lënduar në këmbë. Ai u pa në kamera duke ecur me vështirësi pas ngjarjes.
Me urdhër të prokurorisë u ndalua polici Besart Kovaçi, i dyshuar për shpërdorim detyre, pasi ndodhej në shoqërinë e Nikulajt gjatë incidentit. Policia kryen kontrolle në zona të dyshimta, por nuk ka gjetur të kërkuarit.
Shkak i përplasjes dyshohet një konflikt i ndodhur një vit më parë mes pjesëtarëve të familjes Ndoka dhe Merando Nikulajt.