Operacioni i SPAK-ut është përqendruar në goditjen e një rrjeti të akuzuar për veprimtari kriminale, që përfshijnë trafikun e lëndëve narkotike dhe pastrimin e parave në shuma të mëdha. Hetimet kanë zbardhur komunikime të realizuara përmes platformës SkyECC, të cilat, së bashku me të dhënat e sistemit TIMS, lidhin personat nën hetim me udhëtime drejt Stambollit për të diskutuar transaksione financiare dhe prona.
Në qendër të hetimeve për pastrim parash janë biznesmenët Artur Shehu dhe Ilir Shtufi. Artur Shehu njihet si pronar i pjesës më të madhe të tokës në zonën e Zvërnecit, ku është planifikuar ndërtimi i një resorti luksoz. Përgjimet tregojnë se të hetuarit kanë shmangur diskutimet specifike për çështje prone, parash ose investime nëpërmjet telefonit, duke kërkuar takime të drejtpërdrejta.
Nga komunikimet e zbardhura rezulton se shtetasi Adrian Rama ka udhëtuar drejt Stambollit në periudhën korrik-shtator 2020 për të takuar Artur Shehun. Në bisedat e tyre, ata referonin marrëveshje potenciale me investitorë turq, si dhe organizimin e vizitave në terren në Zvërnec, duke përfshirë inspektimin e pronave me mjete lundruese. Aktualisht, organet ligjzbatuese vijojnë veprimet për kapjen e personave të shpallur në kërkim dhe dokumentimin e plotë të veprimtarisë së grupit.