Raporti mjeko-ligjor i përpiluar nga mjeku Marco Di Paolo ka hedhur dritë mbi dinamikën e vrasjes së 25-vjeçarit shqiptar Kevin Muharremi, ngjarje e ndodhur natën e 14 shkurtit në bulevardin della Repubblica në Montecalvoli. Sipas dokumentit të depozituar, viktima u qëllua nga një armë gjysmëautomatike Beretta, ku një plumb i vetëm në anën e djathtë të qafës shkaktoi dëmtime të rënda në rruazat C2 dhe C3. Kjo plagë solli ndërprerjen e rrugëve nervore, paralizë të frymëmarrjes dhe hemorragji të brendshme, duke rezultuar në vdekje të menjëhershme. Ekspertiza konstatoi gjithashtu një plagë tjetër në parakrahun dhe kyçin e dorës së djathtë të viktimës, e cila nuk ishte fatale.
Hetimet, të cilat drejtohen nga prokurori i Pizës, Fabio Pelosi, kanë identifikuar si të dyshuar kryesor Renato Xyke, 20 vjeç. Ky i fundit u ndalua në Arezzo teksa po udhëtonte me familjen e tij në një automjet Range Rover Evoque, mjet nga i cili dyshohet se është qëlluar drejt makinës Fiat Doblò ku ndodhej viktima. Xyke ndodhet në burg që prej ditës së ngjarjes dhe nuk e ka mohuar përfshirjen në të shtëna. Në vendngjarje janë shkrepur të paktën gjashtë plumba, dëshmi e së cilës janë vrimat e gjetura në karrocerinë e automjetit të viktimës.
Sipas rindërtimit të autoriteteve, krimi ishte epilogu i një konflikti që kishte nisur orë më parë midis dy grupeve shqiptarësh. Tensionet filluan fillimisht brenda një lokali në zonën e Capanne di Montopoli, vazhduan në parkingun e objektit dhe dyshohet se janë përshkallëzuar përmes komunikimeve telefonike deri në takimin vdekjeprurës në Viale della Repubblica.
Krahas Renato Xyke, në hetim është edhe një 18-vjeçar shqiptar, i cili ndodhej në automjet me të dyshuarin gjatë ngjarjes. Ky i fundit hetohet në gjendje të lirë dhe është paraqitur vullnetarisht pranë Prokurorisë, së bashku me avokatin e tij, për të dhënë shpjegimet mbi ngjarjen. Hetimet vazhdojnë për të sqaruar të gjitha rrethanat përpara se dosja të dërgohet për në seancën paraprake gjyqësore.
Përditësime
Autopsia e kryer më 13 mars ka zbardhur detaje të reja teknike mbi vrasjen e Kevin Muharremit. Ekspertët mjeko-ligjorë konfirmuan se viktima, banues në Fucecchio, humbi jetën nga një plumb i vetëm i kalibrit 6.75 mm. Në kuadër të procesit gjyqësor, i dyshuari kryesor Renato Xyke do të mbrohet nga avokati Giuseppe Carvelli.