Isida Kipi, dedektive private 45-vjeçare, ka dëshmuar se kontrolloi banesën e Erjon Llapushit në Pogradec për pajisje përgjuese. Në dosjen e siguruar nga gazetarja Anila Hoxha, thuhet se ajo u nis nga Tirana rreth orës 09:00 më 31 janar dhe mbërriti në Pogradec rreth orës 11:50.
Ajo takoi një person emrin e të cilit nuk e di, të cilin e ndoqi me makinën e saj. Të dy u ngjitën në katin e tretë të një banese private, ku personi kishte çelësat dhe hapi derën. Ambientet përfshinin dy dhoma gjumi, një guzhinë, sallon dhe hol pranë derës së daljes.
Kipi përdori një detektor për zbulimin e kartave SIM ose pajisjeve përgjuese. Kontrolli filloi nga dhoma e gjumit bashkëshortore, dhoma e fëmijëve, guzhinaja dhe holli. Tek priza e lidhur me banjën, ajo konstaton pajisjen përgjuese. E vendosi përsëri mbrapa telave, hiqte fazën e prizës për të mos konsumuar energji dhe mbylli prizën. Në atë moment, personi i njoftoi ardhjen e policisë.
Dedektivja deklaron se nuk e njeh Erjon Llapushin dhe ishte hera e parë në atë banesë. Për shërbimin do të paguhej 50 000 lekë të reja. Ajo është proceduar penalisht bashkë me personin në lidhje familjare me Llapushin.
Erjon Llapushi, 37-vjeçar, është i dënuar në mungesë me 17 vite burg nga Gjykata e Elbasanit më 25 janar 2025 për vrasjen me dashje të kamerierit Gazment Kurmaku më 2 tetor 2021 në një lokal në Labinot-Fushë të Elbasanit. Në janar 2025, mbi 200 punonjës të forcave RENEA, FNSH, Operacionale dhe "Shqiponja" kërkuan për të në Pogradec, ku u sekuestruan armë, thika dhe drogë në banesat e gjashtë të arrestuarve.