Sokrat Vata, i dyshuar për vrasjen e një turisti 21-vjeçar portugez në Ksamil, ka rrëfyer versionin e tij mbi dinamikën e ngjarjes përpara grupit hetimor. Sipas dëshmisë, konflikti fillestar ka nisur mes një grupi turistësh, të cilët dyshohet se ishin nën efektin e alkoolit. Vata deklaroi se u ka kërkuar atyre të mbanin qetësi për shkak të pranisë së klientëve të tjerë në ambientet e lokalit "Principotes", por situata agravoi në një përplasje fizike.
Në lidhje me mjetin e krimit, Vata ka pohuar se thika nuk ishte e tij, por e mbante viktima në dorë. Ai pretendoi se gjatë përleshjes arriti t'ia marrë thikën 21-vjeçarit dhe më pas e goditi atë. Nga ana tjetër, autoritetet policore kanë sekuestruar kamerat e sigurisë në zonë për të përcaktuar rrethanat e sakta. Megjithatë, pamjet e disponueshme nuk ofrojnë qartësi të plotë, pasi momenti i goditjes ka ndodhur në një distancë të largët dhe në kushte errësire.
Sipas të dhënave të Policisë, viktima kishte mbërritur në Shqipëri rreth një javë më parë në shoqërinë e disa miqve. Deri më tani, familjarët e të riut nuk janë paraqitur për të kryer procedurat e tërheqjes së trupit, ndërsa hetimet për zbardhjen e plotë të ngjarjes vijojnë.
Përditësime
Dëshmitarët okularë, miq të viktimës me shtetësi portugeze dhe franceze, kanë deklaruar përpara hetuesve se nuk kanë qenë të pranishëm në skenën e krimit. Ata konfirmuan se kanë mësuar mbi ngjarjen tragjike vetëm pasi kanë mbërritur shërbimet e Policisë së Shtetit në vendngjarje.