Policia e Tiranës njoftoi sot zbardhjen e ngjarjes së ndodhur më 25 shtator në rrugën “Hysni Gërbolli”, ku mbeti i plagosur me armë zjarri në këmbë shtetasi Gjenk Karabeg. Sipas hetimeve, ngjarja ndodhi pas një konflikti në një lokal, ku 54-vjeçari Sajmir Pasmaçiu qëlloi me armë zjarri dhe më pas u largua nga vendngjarja. Për Pasmaçiun është shpallur kërkimi policor për veprat penale “Vrasja e mbetur në tentativë”, “Prodhimi dhe mbajtja pa leje e armëve luftarake”, “Mbajtja pa leje e armëve të ftohta” dhe “Prishja e qetësisë dhe rendit publik”. Gjatë kontrollit në banesën e tij u sekuestruan një armë gjahu, një mjet prerës dhe municion.
Në lidhje me këtë konflikt, u arrestua në flagrancë 20-vjeçari Samuel Tahiraj, i cili dyshohet se është përfshirë në një përleshje me sende të forta, ku mbeti i lënduar një 18-vjeçar. Tahiraj akuzohet për “Plagosje të lehtë me dashje”, “Moskallëzim krimi” dhe “Prishje të qetësisë dhe rendit publik”. Po ashtu, policia nisi procedimin penal në gjendje të lirë për dy shtetas të tjerë, 49 dhe 18 vjeç, të cilët dyshohet se goditën 20-vjeçarin Tahiraj.
I dëmtuari Gjenk Karabeg, 33 vjeç, i njohur edhe si “Leumasi”, u arrestua nga autoritetet shqiptare me qëllim ekstradimi drejt Kosovës. Ai rezulton i dënuar nga Gjykata Themelore në Gjakovë me 50 ditë burgim për veprën penale “Posedimi i paautorizuar i narkotikëve, substancave psikotrope ose analoge”. Materialet procedurale i janë përcjellë Prokurorisë së Tiranës për hetime të mëtejshme.