Emisioni Në Shënjestër në News24 ka zbardhur rrjetin financiar të organizatës së drejtuar nga Franc Çopja, i njohur edhe si Franc Gergely. Dokumentari nxjerr në pah transfertat e mëdha të parave drejt Dubait, Turqisë, Bolivisë dhe dorëzimin e floririt në Tiranë, të siguruara nga aktiviteti kriminal.
Rolin kryesor e kishte Maklen Mici, njeriu i besuar dhe "llogaritari" i Çopjës për pastrimin e parave. Sipas komunikimeve në Sky ECC, nga 21 maji 2020 deri më 8 mars 2021, Mici transferoi 7 milionë euro në Stamboll, 7.9 milionë euro në Dubai, 8 milionë euro në Bolivi, si dhe 140 kg lingota floriri në vlerë 7.2 milionë euro, të dorëzuara Dorian Dylit në Tiranë. Për çdo operacion, ai përfitonte komisione të larta.
Hetimet tregojnë se në një periudhë disa mujore u kryen transferta të shumta milionëshe drejt Dubait, përfshirë dërgesa direkte nga Tirana, të koordinuara nga persona të besuar. Brenda pak ditësh lëvizeshin miliona euro, çka dëshmon kapacitetin financiar dhe organizimin e grupit.
Këto para investoheshin kryesisht në pasuri të paluajtshme dhe asete luksi në Dubai për të fshehur origjinën e tyre dhe për të siguruar qëndrimin atje. Po ashtu, kishte tentativa për investime në Shqipëri përmes personash të tretë, për të shmangur hetimet.
Ekspertët vlerësojnë se fuqia financiare e grupeve kriminale shqiptare ndikon në tregun ndërkombëtar të kokainës. Sektorët e ndërtimit dhe turizmit mbeten më të ekspozuar ndaj pastrimit të parave.