Në emisionin Në Shënjestër të kanalit News24, me autore Klodiana Lalën, u zbardhën bisedat e transkriptuara nga aplikacioni SkyEcc midis Franc Çopja dhe Ervis Çela. Këto biseda tregojnë se Çopja, bashkëpunëtor i ngushtë i Çelës, e orientoi atë të investojë të ardhurat në lingota ari, duke shmangur fshehjen e tyre në tokë pasi rrezikojnë të dëmtohen.
Ervis Çela, nga fshati Fatish i Peqinit dhe i vendosur në Paraguaj, krijoi bashkë me vëllezërit Albini, Rizai dhe Ardiani një organizatë ekonomike të goditur nga SPAK si njëra ndër më të rëndësishmet. Në SkyEcc, ai u shpreh se kishte fituar 100 milionë euro, por shqetësohej për transferimin e tyre në Shqipëri. Ai përmendi gjithashtu blerjen e dy portofoleve për investim në kriptomonedha, me vlerë 14 milionë dollarë.
Në një bisedë specifike, Çela tha: "Shok mora 3.8 milionë sot në Tiranë… Kam 200 ullinj në mal, duhen futur me ndonjë qyp… Se ullinjtë rrojnë shumë…". Çopja iu përgjigj: "Kthej në flori…. Mos i fut lekët në tokë… Më dëgjo mua…". Çela vazhdoi: "S’ka flori… Duhet me grabit ndonjë bankë… Duhet me porosit nga Afrika…". Çopja premtoi të ndihmonte për furnizim dhe theksoi: "E di që s’ka… Do flas unë me njërin, mos na i sajon. Por mblidhi avash-avash. Por mos fut lek në tokë se prishen", duke synuar 100-200 kile ari.
Burimet njoftuan se Çopja vetë po investonte në mënyrë të ngjashme. Grupet kriminale përdorin gjithnjë e më shumë kriptovalutat për pagesa të lëndëve narkotike dhe për investime në portofole dixhitale.