Në kuadër të hetimeve për tentativën e grushtit të shtetit të ndodhur më 15 korrik 2016 në Turqi, janë bërë të ditura hollësi të reja mbi skenarin e planifikuar për eliminimin e presidentit Recep Tayyip Erdogan. Sipas informacioneve të publikuara, atentatorët synonin ta kapnin kreun e shtetit në hotelin ku ai po qëndronte, për ta nxjerrë më pas jashtë territorit turk përmes një avioni të huaj, ku edhe do të finalizohej vrasja.
Plani nuk u realizua pasi presidenti Erdogan u largua nga hoteli pak përpara se grupi i puçistëve të mbërrinte në vendngjarje. Kjo ngjarje, e cila shënoi një kthesë në historinë moderne të Turqisë, rezultoi me humbjen e jetës së më shumë se 250 personave gjatë përplasjeve midis forcave qeveritare dhe ushtarakëve që tentuan të merrnin kontrollin e institucioneve kryesore të vendit.
Qeveria e Turqisë ka akuzuar vazhdimisht rrjetin e klerikut Fethullah Gulen për organizimin e këtij puçi. Nga ana tjetër, imami tashmë i ndjerë dhe mbështetësit e tij i kanë hedhur poshtë këto akuza, duke mohuar çdo përfshirje në përpjekjen për përmbysjen e rendit kushtetues.