Dritan Gjika, shqiptar i lindur në Shqipëri dhe i dyshuar si udhëheqës i një rrjeti trafiku kokaine në Ekuador, komunikonte përmes platformës së enkriptuar SkyECC për transaksione droge. Bisedat, dekriptuar nga autoritetet europiane në vitin 2021, u shpërndanë me prokurorët ekuadorianë dhe u përdorën si provë në gjyqin kundër tij dhe anëtarëve të rrjetit.
Në një shkëmbim mesazhesh, Gjika, i njohur si Tony, shprehte irritimin për pagesën e vonuar të "materialit" të dërguar me kontejner nga Ekuadori në Spanjë. Ai i tha partnerit: "Shiko zotëri, partneri yt më tha se do të dërgonte paratë dje, pastaj më vonë më tha sot." Kur partneri e cilësoi si mosbesim, Gjika u përgjigj: "Zotëri, nuk është mosbesim, është respekt! Gjithçka ka arritur mirë, çmimi u vendos së bashku dhe ty të pëlqeu. Nuk kam nevojë të pres derisa ta shesë ngadalë atje për të marrë pagën time!"
Më pas, ai sqaroi: "Është thjesht biznes dhe na duhet shpejtësi."
Bisedat, të cilat shtrihen nga maji 2020 deri në mars 2021, ofrojnë pamje të operacioneve të përditshme të organizatës, e cila funksiononte si korporatë ndërkombëtare me synim fitimin maksimal. OCCRP (Projekti për Raportimin e Krimit të Organizuar dhe Korrupsionit) ka siguruar qindra faqe me këto biseda, të përzgjedhura nga prokurorët si provë.
Mesazhet nxjerrin në pah nivelin e lartë të infiltrimit në polici dhe portet e Ekuadorit, veçanërisht në qytetin portual Guayaquil, ku Gjika dhe bashkëpunëtorët e tij organizonin takime. Gjika kërkohet në Ekuador për akuzat e krimit të organizuar dhe pastrimit të parave.