Një operacion i gjerë i Policisë Kombëtare dhe Prokurorisë së Përgjithshme të Ekuadorit çoi në arrestimin e tetë personave, të akuzuar si pjesë e një rrjeti korrupsioni që vepronte në favor të narkotrafikantit shqiptar Dritan Rexhepi Haxhiu. Operacioni përfshiu 11 kontrolle të njëkohshme në qytetet Guayaquil, Quito dhe Morona Santiago.
Sipas hetimeve, të dyshuarit, përfshirë mjekë dhe një zyrtar të Shërbimit Kombëtar të Kujdesit Gjithëpërfshirës për Personat e Privuar nga Liria (SNAI), kishin krijuar një skemë për të simuluar përmbushjen e detyrimeve gjyqësore nga ana e Rexhepit, pavarësisht se ai ishte larguar nga Ekuadori që prej datës 7 shtator 2022 përmes pikës kufitare të Rumichaca-s. Autoritetet konstatuan se në sistemin penitenciar vazhdonin të regjistroheshin paraqitje periodike dhe certifikata mjekësore të falsifikuara në emër të tij.
Një ndër detajet më të spikatura të hetimit është përdorimi i një doreze lateksi me gjurmën e gishtit të Dritan Rexhepi Haxhiut, e cila dyshohet se shërbente për të riprodhuar praninë fizike të tij gjatë kontrolleve rutinë. Të dyshuarit po hetohen për vepra të rënda penale, duke përfshirë krimin e organizuar, mashtrimin procedural, zëvendësimin e identitetit dhe falsifikimin e dokumenteve.
Ministri i Brendshëm, John Reimberg, deklaroi se hetimi 8-mujor ka zbuluar pagesa të kryera në këmbim të shërbimeve të paligjshme, ndërsa theksoi se provat e mbledhura mund të çojnë në zgjerimin e hetimeve ndaj rasteve të tjera të korrupsionit në sistemin publik shëndetësor. Dritan Rexhepi, i lindur më 10 prill 1980 në Velçë të Vlorës, është një personazh i njohur për drejtësinë ndërkombëtare, i akuzuar për vrasje policësh, trafik ndërkombëtar droge dhe rrëmbimin e Jan Prengës.