Në Ditën Ndërkombëtare të Monumenteve, më 18 prill 2026, u zbulua fasada e restauruar plotësisht e Muzeut Historik Kombëtar në Tiranë. Lajmin e bëri të ditur Blendi Gonxhja, ministër i Turizmit, Kulturës dhe Sportit, përmes një videoje në rrjetet sociale, ku paraqiten ndërhyrjet e kryera dhe rezultati përfundimtar.
Ministri theksoi se ky hap shënon një moment të rëndësishëm në procesin e rikonstruksionit dhe konservimit të këtij monumenti kulture të kategorisë së II-të. Pas restaurimit të mozaikut monumental në kuadër të programit EU4Culture, të financuar nga Bashkimi Evropian dhe të zbatuar nga UNOPS, tani është përfunduar ndërhyrja në të gjithë fasadën. Kjo garanton ruajtjen e vlerave historike dhe arkitektonike të godinës, duke hapur rrugën për fazat e mëtejshme të përforcimit struktural, rimuzealizimit dhe rikonceptimit të institucionit.
Restaurimi urban dhe rindërtimi mbështeten nga një marrëveshje e nënshkruar në shkurt 2026 midis Ministrisë së Turizmit, Kulturës dhe Sportit dhe Bankës Europiane të Investimeve. Granti me vlerë 350 mijë euro financon përgatitjen, projektimin dhe rishikimet teknike të projektit, mbikëqyrjen, menaxhimin dhe prokurimin. Shërbimet e konsulencës sigurojnë përmbushjen e standardeve të larta për efikasitetin e energjisë, qëndrueshmërinë ndaj kushteve klimatike, rehatinë e vizitorëve dhe integrimin me mjedisin urban përreth.
Muzeu Historik Kombëtar, i dëmtuar nga tërmeti i 2019-s, mbylli dyert për publikun më 15 mars 2024. Ai do të qëndrojë i mbyllur për katër vjet, me rihapjen e paraparë më 15 mars 2028. Institucioni u përurua më 28 tetor 1981 dhe është muzeu më i rëndësishëm në Shqipëri.