Studiuesit kanë zbuluar një sistem diellor të ri, Wispit 2, rreth 400 vite dritë larg Tokës, ku po lindin dy planetë rreth një ylli shumë të ri. Ky zbulim është publikuar në revistën The Astrophysical Journal Letters.
Ekipi, i udhëhequr nga Chloe Lawlor e Universitetit të Galway-it në Irlandë, përdori teleskopin Very Large Telescope në Kili për të vëzhguar këtë fazë të hershme të formimit planetar. Sipas Lawlor-it, Wispit 2 është “pamja më e mirë që kemi pasur ndonjëherë për të kaluarën tonë”.
Sistemi ngjan me mënyrën si dukej Sistemi Diellor ynë rreth 5 miliardë vite më parë, kur Dielli ishte i rrethuar nga një disk me gaz dhe pluhur, ndërsa planetët sapo po formoheshin. Pas sistemit PDS 70, të zbuluar në vitin 2018, ky është vetëm sistemi i dytë planetar i vëzhguar në një fazë kaq të hershme.
Ndryshe nga PDS 70, Wispit 2 paraqet një strukturë më të ndërlikuar, me unaza dhe hapësira bosh të dukshme në diskin protoplanetar.