Volodymyr Zelensky, presidenti i Ukrainës, tha se SHBA i kanë kërkuar Ukrainës të heqë dorë nga pretendimet territoriale ndaj zonave të pushtuara nga Rusia, në këmbim të garancive sigurie. Kjo deklaratë u bë të hënën, sipas mediave të huaja.
"Miqtë tanë amerikanë po përgatisin garanci sigurie. Por ata thanë, së pari ky shkëmbim territoresh, ose diçka e tillë, dhe pastaj garancitë e sigurisë", u shpreh ai. Zelensky insistoi: "Unë besoj se garancitë e sigurisë duhet të vijnë të parat".
Ai theksoi se Ukraina është e gatshme për kompromis, por jo për një që "do t’i lejojë Rusisë të rikuperohet shpejt dhe të vijë përsëri dhe të na pushtojë". Kjo nuk do të thotë, sipas tij, "ne do të heqim dorë nga territoret tona".
Zelensky rikujtoi Memorandumin e Budapestit të vitit 1994, ku Ukraina hoqi dorë nga armët bërthamore sovjetike dhe avionë të tjerë, në këmbim të garancive për siguri, sovranitet e pavarësi. "Në fund të fundit, nuk kemi asnjë nga ato armë dhe nuk kemi garanci sigurie. Askush nuk e mbrojti pavarësinë tonë", tha ai.
Çdo garanci e re sigurie do të hyjë në fuqi vetëm pas votimit në Kongresin amerikan.
Ndërkohë, Kremlini njoftoi se negociatat në Gjenevë për Ukrainën do të mbulojnë një gamë më të gjerë temash se raundet në Abu Dhabi, duke përfshirë çështjet kryesore territoriale. Zëdhënësi Dmitry Peskov shpjegoi se kjo kërkon praninë e kreut të delegacionit rus, i cili mungonte në bisedimet në Emiratet e Bashkuara Arabe.