Presidenti i Ukrainës, Volodymyr Zelensky, përmes një njoftimi në platformën X, bëri të ditur se gjatë muajit të kaluar, forcat ukrainase kanë shkaktuar humbje të konsiderueshme në radhët e ushtrisë ruse. Sipas deklaratës së tij, gjatë muajit korrik, janë vrarë ose plagosur rëndë 30.272 ushtarë rusë në vijën e frontit.
Lideri ukrainas theksoi se këto shifra janë siguruar kryesisht nëpërmjet përdorimit të dronëve dhe përfshijnë vetëm rastet për të cilat ekzistojnë prova të qarta filmike. Sipas vlerësimit të tij, situata në terren dëshmon se luftimet mbeten të ashpra dhe se trendi i humbjeve për forcat ruse vijon të jetë në nivele të larta.
Në lidhje me rrjedhën e konfliktit, Zelensky u bëri thirrje aleatëve ndërkombëtarë që të vijojnë ndihmën ushtarake, duke e cilësuar mbrojtjen ajrore si prioritetin kryesor për mbrojtjen e jetëve. Ai theksoi rëndësinë e dëgjimit të kërkesave të Ukrainës nga ana e partnerëve ndërkombëtarë për dërgimin e paketave mbështetëse, duke shtuar se çdo paketë e tillë shpëton jetë.
Sipas shifrave të bëra publike nga Kievi, që nga nisja e agresionit rus në shkurt të vitit 2022, forcat ruse kanë pësuar rreth 700 mijë të vrarë, ndërsa humbjet totale, duke përfshirë të plagosurit rëndë, arrijnë në afërsisht 1.6 milionë ushtarë.