Presidenti i Ukrainës, Volodymyr Zelensky, deklaroi më 27 shtator 2026 se forcat e vendit të tij kanë neutralizuar 10.660 trupa ruse brenda një jave. Sipas njoftimit, shifrat përfshijnë si ushtarët e vrarë, ashtu edhe ata të plagosur, të cilat pala ukrainase pretendon se i disponon të dokumentuara përmes provave video.
Këto rezultate janë arritur në kuadër të operacionit ofensiv Vivaldi, i cili po zhvillohet nga forcat ukrainase në zonën e Lymanit, në rajonin e Donetskut. Përveç këtij sektori, luftimet më të ashpra raportohen në Pokrovsk dhe Kostiantynivkë. Ushtria ukrainase po vazhdon operacionet edhe në rajonet e Zaporizhzhias, Kharkivit dhe Sumyt.
Ndërkohë, Operacioni Vivaldi është shoqëruar me pretendime për përparime territoriale, duke përfshirë rimarrjen e rreth 40 kilometrave katrorë në Donetsk dhe çlirimin e disa fshatrave si Shandryholove dhe Derilove. Këto të dhëna nuk janë verifikuar në mënyrë të pavarur. Rusia nuk publikon shifra të rregullta mbi humbjet e forcave të saj. Sipas të dhënave të Shtabit të Përgjithshëm të Ukrainës, humbjet e përgjithshme ruse që nga nisja e pushtimit në shkurt të vitit 2022 kanë tejkaluar shifrën e 1.5 milionë ushtarëve të vrarë dhe të plagosur, ndërsa humbjet për vitin 2026 raportohen mbi 300 mijë.